Wat un verschil

Wat un verschil tösse vruuger en noow
Dao euver geit dit gedich
Waas alles toen baeter in dae aoje tied?
Soms wal en soms neet volges mich

De dokter, de meister en de pestoér
Dao keek men toen ech tegenop
As noow eine liëraar ein kink haet gestraft
Guf vader dae mins op de kop

De telefoon met unne draod aan de moor
Vur belle noom men zich de tiéd
Noow zit de mobiel vort in iddere tes
En raakt menigein um zelfs kwiét

Tv dao waas vruuger neet altied iets op
Zwart-wit waas de kleur die men keek
En noow zien der hongerde zenders te zeen
Maar minse leef, wat ein gegreek

De manne die hoote gewuün Jan of Piet
De vrouwe Francisca of Truuj
Verneume det is der noow ech nimmer beej
Elk kink is ein individu

Un ôngerbôks waas van ech wol, zelf gebreid
En waas van ein reuze formaat
Op vandaag wuurt der nimmer vuul stof aan besteed
Eine veter bedekt noow det gaat

Ein mooder waas altiéd de ganse daag toés
Ze werkte zich ech oet de naod
Noow hebbe de mooders un laupbaan der beej
De kinger die hange op straot

De was waas ein daagtaak, det ging op de hank
Op mandig deej idderein mei
Noow dreit ze vanzellef schoën in ein meschien
En wasse we dus vul miër grei

Op zaterdig elk umstebeurt in de kuúp
En idderein vulde zich fris
De staomdoesj, ut bubbelbad of ut bidet
Haet eemus det toen oeit gemis?

Men waas hiel tevreeje met al wat men hei
Stong noeit beej de bank in de schöld
Maar noow wilt men altiéd maar miër en wir miër
En is men door aafguns vervuld

En neemes hei stress in dae vruugere tiéd
Ondanks zwaor lichamelijk werk
Noow wuurt der gesurfd en gemaild en gechat
Det gejaag maakt ôs vul minder sterk

Maar bin noow ens iërlik, wat waas noow ut best?
Want iddere tiéd haet wal get
En iddere mins haet ein vruuger en noow
Ut is maar det ge ut wet